هو: متى عيد ميلادك؟
هي والتعبير البادي على ماروكو نفسه على وجهها: شوووووووو مش عارف متى عيد ميلادي؟
هو: اه مش عارف ونسيت متى وبالاحرى ماحكيتيلي
هي: شو ما حكيتلك ؟ انا متأكدة اني حكيت ولك كل العالم بتعرف متى عيد ميلادي
هو : انا بتذكر انك حكيتيلي انه عيد ميلادك بشي مناسبة عيد الشجرة عيد العمال عيد الام عيد شو؟
هي: اه مش متذكر ؟ طيب بديش احكيلك متى
هو : اريح بتوفري حق الهدية اللي بدي اسدها
هي: شووووو؟ عنجد بتحكي
هو: هيهيهيهي لأ بمزح
وبعد اسابيع...........هو: انت متى حكتيلي عيد ميلادك؟
هي: وبعدين مع هل الموضوع ما بدنا نسكره
هو: يلا سكري هل الطابق وخلصينا
هي: يا سيدي عيد ميلادي بشهر 3 واعتقد بتعرف برجي ..... دور بالانترنت شو تواريخ الابراج وبتعرف
هو: اف انا متذكر انك حكيتيلي انه بعيد الام وهو متى عيد الام؟
هي: معقول مش عارف متى عيد الام
هو: اه اه مش عارف لانه مش فاضي لهل الشغلات
هي بقلبها: على اساس انك بزنس مان ومش ملحق
هي وعلى وجهها ابتسامة صفرا : ياسيدي دور بالانترنت وبتعرف متى
بعد يومين هو: انا دورت وما عرفت طلع كل بلد بيحتفل بهل اليوم شكل
هي بقلبها: شوف هل الحجة يعني مش عارف يدور متى الاردن بالذات بتحتفل فيه او يسأل شي حدى؟
هي بعد ما قرفت : ياسيدي احكيلك انا عيد ميلادي بشهر 4 وبس يجي بحكيلك
ب 14/03/2009
هو وهوفرحان بحاله مفكر حاله انه تذكر: عيد ميلاد سعيد
هي متفاجئة : شو عيد ميلاد سعيد ليش ميلاد مين؟
هو : انت مش عيد ميلادك اليوم؟
هي وما بدي احكي شو كان بدها تعمل : لأ مش اليوم و يا عمي عيد ميلادي ب 21/03 يوم عيد الام ويوم الكرامة ويوم عيد الربيع ويوم الاعتدال الربيعي يعني يوم ما بنتسى بسهولة
بعد يومين ..... هو : متى حكتيلي عيد ميلادك يوم الاعتدال الخريفي ؟
هي : الربيعي الربيعي مش الخريفي وبعدين معك زهقتني
هي بقلبها : اي رح اشد شعري منك ... خلص ياعمي بديش انا اعرف متى عيد ميلادي
هي: شو رأيك نروح مشوار يوم السبت بما انه الجو حلو
هو: وشو المناسبة ؟
هي بقلبها: عيد ميلادي يا ............................ وما ادراك شو حكت بقلبها
هي: ولاشي الجو حلو و منه منغير جو
هو: لأ مش فاضي
هي بقلبها : اه نسيت انك بزنس مان
ب 20/03
هو: سمعت بكرة عيد الام يعني بكرة عيد ميلادك؟
تجاوبه هي ونفسها تكسر شي شغلة على مخه التخين: ما بعرف
هو : بتريحي
ب 21/03 التاسعة صباحا اتصل هو
هي فرحت وحكت اكيد بدو يعايدني
هو: تروحي معي على المدينة الطبية
هي: ليش؟
هو: اجيب دوا لعمي
هي بقلبها: شوووووووووووو يا .....................وبعدين مع هل التناحة
هي: لأ تعبانة بدي انام
هو: بتريحي
في المساء
هي: اليوم عيد ميلادي اذا بهمك
هو: والطقاعة (كلمة اردنية تعني شو يعني) ؟
هو : لا لا كل عام وانت بخير
هي بتصرخ وبتعاتب
هو : شو مش سامع مش سامع مش سامع
هي : احسن لا تسمع باي
هي بتفكر وتضحك على هل الميلاد الغريب وبتحكي مع حالها : اي حتى الزبال بحارتنا بيعرف متى عيد ميلادي
طيب كل عام وانا بخير وامهاتنا كلهم بألف خير
